Дзякуем нашым святарам!

Сення, у Вялікі Чацвер, студэнты катэхетычнага каледжа хацелі б павіншаваць усіх святароў, а асбліва тых, хто шчыра дзеліцца з імі сваімі ведамі — сваіх выкладчыкаў!

Мы Вас вельмі любім, цэнім і дзякуем Богу, што па Яго святой волі Вы з’явіліся ў жыцці кожнага з нас.

Шлях святара цяжкі і цярністы… Няхай Бог адорыць Вас здароў’ем, пастырскай мудрасцю, дасць Вам мужнасці, цярплівасці і пакоры. Божай дапамогі і благаслаўлення ва ўсіх нялегкіх справах і  пачынаннях!

Ад усяго сэрца дзякуем за час, які Вы нам прысвячаеце, за Вашыя мудрыя парады, за шчыры ўдзел у жыцці кожнага з нас, за чуласць і спагадлівасць, за ўвагу да ўсіх нашых спраў і праблем, за далікатныя дакоры і цярплівыя павучанні, за Вашыя веды, за Вашыя малітвы, а галоўнае — за любоў, якой Вы шчыра адорваеце кожнага з нас.

Мы цэнім Вашую дзейную энергію, Вашую адкрытасць і жывы водгук на нашыя часам нязграбныя намаганні і дзеянні,  Вашую добразычлівасць да ўсіх. Мы дзякуем Богу за Вашыя намаганні, за наш каледж, за цеплыню і утульнасць, што напаўняюць яго сцены, і што ў ім заўседы знойдзецца месца для кожнага. За тое, што з усімі сваімі хваробамі і болем душы мы спяшаемся пад яго дах, каб ажывіць душу, адчуць Бога і вынесці крупіначку святла і супакою ў свой дом і ў свае жыцце!

З ДНЁМ СВЯТАРСТВА

Няхай жа Усемагутны Бог
Сам блаславіць Ваш шлях святарскі,
Каб сярод штодзённых турбот
Спазналі Вы шмат Божай ласкі!

Нязломнай моцнай веры мы
Жадаем шчыра Вам, ад сэрца,
Любові Божай, што заўжды
Праз Сэрца Езуса ліецца,

І святым Словам кожны дзень
Узмацняцца, маючы надзею,
Што светлы дзень хутка прыйдзе —
Любоў святая заяснее!

Сам Хрыстус каля Вас стаіць,
Да сэрца зараз прамаўляе,
У вочы моўчкі Вам глядзіць,
І ў Эўхарыстыі яднае,

Яднае Хрыстус Вас з Сабой,
Каб годна Вы Айцу служылі
І неслі бліжнім супакой,
Што ў Духу Святым аднавілі!